Solasaldi digitalen bigarren zikloari ekingo dio bihar Gure Eskuk
Bizi dugun osasun krisiak salbuespenezko egoera batera eraman gaitu, eta azalera ekarri ditu lehendik ere mahai gainean zeuden hamaika auzi. Ertz horiek jorratzen ari da Gure Esku, alor anitzetako pertsona erreferenteei hitza eman eta etorkizunera begirako hausnarketa partekatuak sustatuz, ‘Gelditu. Hausnartu. Erabaki’ solasaldi digitalen bidez.
Apirilaren 23az geroztik, bost saio antolatu dira dagoeneko eta hauen arrakasta ikusita, beste bost ataleko bigarren ziklo bat abiatuko du bihar, formatu berean: bi hizlari elkarren artean solastuko dira, ordu erdiz, eta dagokien gaiari buruz egiten duten egoeraren analisia eta euren ustez behar diren aldaketak eta hartu beharreko erabakiak partekatuko dituzte.
Hauek dira zikloa osatuko duten saioak:
Zaindu zaintzen gaituen hori | Maiatzak 14 · 19:00 *Euskaraz
- Itziar Ferrón, Villodas zahar-etxeko zaintzailea eta ELA-ko langile ordezkaria
- Karlos Ibarguren, doktorea eta Osakidetzako Emergentzietako Asistentziako medikua
Krisi ekonomikoa: lehengo lepotik burua | Maiatzak 19 · 19:00 *Euskaraz
- Ainhoa Etxaide, LAB sindikatu Feminismo arduraduna
- Joseba Barandiaran, ekonomialaria eta Euskal Ekonomisten Elkargoko kidea
Teknologia: askatasuna eta kontrola | Maiatzak 21 · 19:00 *Gaztelaniaz
- Eva Rodriguez de Luis, ingeniaria eta teknologia berrietan aditua, Xataka atariko editorea
- Gorka Julio, informatikari software-garatzailea, irakaslea eta Talaios Kooperatibako kidea
Euskara: etxealditik etorkizunera begira | Maiatzak 26 · 19:00 *Euskaraz
- Kike Amonarriz, soziolinguista eta Euskaltzaleon Topaguneko lehendakaria
- Mertxe Mugika, AEK-ko kidea eta koordinatzaile ohia
Klima eta natura: zirt edo zart egiteko unea | Maiatzak 28 · 19:00 *Euskaraz
- Ane Zabaleta, geologoa, zientzian doktore eta geodinamikan espezializatua; eta EHUko ikertzailea
- Unai Pascual, Ikerbasque Ikerlaria (BC3), irakaslea, eta bioaniztasunaren galera ikertzeko IPBES adituen taldeko kidea (NBE)
Elkarrizketak zuzenean ikusi ahalko dira, baita gerora ere, Gure Eskuren Youtube-ko kanalean: https://labur.eus/JdS70